Primijetile smo da vam se mnogo dopao blog o našim jutarnjim navikama, pa smo odlučile da nastavimo u tom duhu i odemo korak dalje 😁
Danas vas vodimo kroz naše večernje rutine.

Kako je stiglo ljeto, tako su se i naše navike prirodno promijenile! Kupanje je postalo učestalije, šetnje počinju tek kada sunce zađe, a večera se pomjerila za sat kasnije 😁
I mi smo se, izgleda, prilagodile ljetnjem računanju vremena 😄

Moja večernja rutina počinje kada se moja beba probudi iz popodnevnog sna, negdje oko 17:30–18h. Tada kreće priprema večere i spremanje za šetnju. Idealno vrijeme za izlazak nam je oko 19h – dovoljno je prijatno, često ima i malo vjetrića, što sve čini još ljepšim. Ona uživa, a ni mama se ne žali.

Po povratku iz šetnje obično slijedi kupanje. Navikla sam da sve odradim dok sam još “na nogama”, tako mi je lakše 😁

Nakon kupanja, dok je umotana u peškir, mazimo se na krevetu još par minuta. To nam je jedan od najnježnijih dijelova dana

Zatim slijedi malo igre, a često tada pojede i ostatak večere – rijetki su trenuci kada sve pojede odmah.
Trudim se da je do pola 10 već uspavana, kako bih ostatak večeri mogla posvetiti sebi i svom miru. 😊

Večernja rutina bebe od osam mjeseci kod Ivane je skoro ista kao i ona koju je uspostavila odmah po rođenju. Naravno, ima i razlika. Prije svega otkako je uvela večeru, to je znatna promjena. Tako da rutina sada kreće večerom, uz pjevušenje i zanimaciju za bebu. Nakon toga izlaze u šetnju – nekad samo mama i beba, a nekad im se pridruži i tata. Uglavnom obiđu komšiluk, vide šta ko radi i pitaju za zdravlje. Prije izlaska naprskaju se sprejem protiv komaraca, a beba dobije dodatnu zaštitu – mrežicu preko kolica.
Šetnja je postala dio večernje rutine tek nedavno, otkako su krenule ljetnje vrućine. Ivanina beba obožava boraviti napolju i nakon toga lakše zaspi. Po povratku slijedi kupanje. Dok Ivana priprema stvari i pušta vodu, tata i beba se maze i igraju, a onda svi zajedno učestvuju u kupanju. Beba često poprska i mamu i tatu, pa nastane opšta cika i smijeh.

Nakon kupanja slijedi nezaobilazno mazanje kremom, jer Ivanina beba ima problem s atopijskim dermatitisom. Poslije toga – mlijeko, pozdrav s tatom i ljuljanje za spavanje. U posljednje vrijeme uspavljivanje najčešće preuzima Ivana, jer tata koristi večernju hladovinu da završi poslove u radionici koje tokom dana, zbog vrućine, nije mogao. Kad beba konačno utone u san – nakon još dodatnog maženja i poljubaca Ivana je spušta u krevetić. A onda slijedi vrijeme za njenu noćnu rutinu… o kojoj ćemo pisati u nekom od narednih blogova. 😊

Kod Maje večernja rutina izgleda ovako: večera je jedini obrok kada su svi na okupu, jer tada tata stiže s posla. U posljednje vrijeme, i mama i tata dobiju poziv da sjednu za mali sto njihovog sina – što cijeloj večeri daje posebnu draž.

Jedni druge hrane, često padne neka šala, pa se večera prekine grajom i smijehom. Kako se u pozadini čuje muzika, nakon večere često svi zajedno zaigraju – bilo da je to neka dječja pjesmica poput „Taši taši tanana“, „Ringe ringe raja“, „Glava-ramena-koljena“ ili čak užičko kolo. Njihov sin ih posmatra s osmijehom i ubrzo im se pridruži u igri.

Nakon toga slijedi kupanje. Pošto su prerasli kadicu, beba se sada tušira nekad mirno stoji, a nekad i mama završi okupana zajedno s njim. Onda tata stupa na scenu – presvlači i oblači dijete, dok se mama tušira.

Zatim slijedi kolektivno pranje zubića uz pjesmicu „Šubi dubi“.
Kada su zubi oprani i pidžama obučena, slijedi čitanje priče za laku noć, zatim dojenje. Tad se dijete umiri, i uz malo ljuljanja ubrzo utone u san.

I tako izgleda naše veče – svaka različita, ali u suštini slična: puno ljubavi, rutine, malo haosa i još više smijeha.
Znamo da se svaka mama nekad pita da li „radi sve kako treba“, ali vjerujte nam, ako vaše dijete ide na spavanje nasmijano (ili makar okupano 😅) radite sjajan posao.

Pišite nam kako izgledaju vaši večernji trenuci – jedva čekamo da čujemo i vaše male rituale. 💛
Vaše majke_panicarke